Ծիծաղով մարդը տարբերվում է կենդանուց

«Խեղկատակների մուտքը քաղաք նրա բնակիչների առողջության համար շատ ավելին արժեր, քան տասնյակ դեղորայքով բեռնված ջորիների մուտքը»,- գրել է բժիշկ Սուդենգենը դեռևս XVII դարում: Ծիծաղը վերացնում է հոգնածությունը:

Ծիծաղի դեպքում մարզվում են բոլոր մկանները, և արյունը արագ հարստանում է թթվածնով: «3 րոպեանոց ծիծաղը փոխարինում է 15 րոպեանոց մարմնամարզությանը»,- գրել է գիտնական Կարլ Ռոդալը:

Ծիծաղը, ինչպես պարզվում է, շատ լուրջ առողջական և սոցիալական երևույթ է, որի մասին ստեղծված է նույնիսկ հատուկ գիտություն` գելոտոլոգիա: Այն հաստատում է` ծիծաղել պետք է ոչ միայն նրա համար, որ ամեն ինչ լավ է և զվարճալի, այլ` որ ամեն ինչ լինի լավ ու զվարճալի: Այլ կերպ ասած, որքան շատ ծիծաղում է մարդը, այնքան նա առողջ է ու երջանիկ:

Ծիծաղի բուժիչ հատկությունների առավել ընդգրկուն ուսումնասիրությամբ գիտնականները սկսել են զբաղվել 60-ականների կեսերից: Ամերիկացի նյարդաբան Ուիլյամ Ֆրայը առաջինն է հայտնաբերել, որ ծիծաղը ամրացնում է օրգանիզմի իմունիտետը, նվազեցնում է սթրեսային հորմոնների արտադրությունը և արյան մեջ ավելացնում է երջանկության հորմոնի` էնդորֆինի քանակը:

Իմիջիայլոց` ծիծաղը կարելի է դիտարկել նաև որպես սպեցիֆիկ մերսում` նպաստող մկանների ավելի քան 80 խմբի թուլացմանը: Ծիծաղը ամրացնում է նաև սիրտը և նույնիսկ ընդունակ է իջեցնել ճնշումը հիպերտոնիկների մոտ: Հետազոտությունները ցույց են տվել, որ ծիծաղելը օգտակար է նաև նրանց, ովքեր տարել են ինսուլտ: Ծիծաղելիս դեմքի մկաններից հատուկ իմպուլսներ են  ուղղվում դեպի ուղեղը, ինչը և բարենպաստ ազդեցություն է ունենում կենտրոնական և ընդհանրապես ողջ նյարդային համակարգի վրա: 

Բժիշկները կոչ են անում հաճախ ծիծաղել: Այն, որ ծիծաղն ու ժպիտը օգտակար են մարդու օրգանիզմին, հայտնի է դեռ Հիպոկրատի օրերից: Լավատեսները միշտ ապրել են երկար: Իսկ ծիծաղը նույն ժամանակ նաև ֆիզիոլոգիական երևույթ է: ԱՄՆ-ում գիտնականների անցկացրած հետազոտությունները ապացուցել են, որ ծիծաղի թերապիան ի զորու է մարդուն դուրս հանել դեպրեսիայից` առանց որևէ հակադեպրեսանտ կիրառելու:

Հարցեր, պատասխաններ, մեկնաբանություններ